وصفة العيد المخبز بالكاوكاو

 تعديل الوصفة.

السلام عليكم تلايموا هنا تشو و طلعوا المنشور لتعم الفائدة على الجميع مخبز الكوكاو بجميع اسراره و رايحة نعطيكم سر حصري عند زوزو😍😁 لي يخليه يجي طري و بنة ما نحكيلكمش يقطر عسل طري طري يذوب ذوبان الوصفة بعد التعديل باذن الله مازال كاين الجديد

وصفة المخبز بالكاوكاو:

 نكيل بالغرفية تاع الشوربة 

ثلاث كيلات كوكاو مرحي رقيق الكيلة الثالثة ما نعمرهاش نلحق لثلاث ارباع و نكمل نعمرها جوز الهند دروه يتشرب لينا البيض (جوز الهند نزيد نرحيه في الخلاط). ثلاث ملاعق كبيرة قاتو بيمو مرحي هذا السر لي يخلي المخبز يجي طري و معسل(ربع كيلة). لفاني. عطر اللوز. كمية مليحة من قشور الليمون .قرصة صغير بين الاصابع فقط خمارة الحلويات باش يجي خفيف ماشي مكدس. ملعقة كبيرة عسل يمد طراوة نخلط جميع المقادير مع بعض و نخليهم بجهة و في وعاء آخر ندير كيلة ناقصة سكر . ملعقة كبيرة ماء الزهر. ثلاثة صفار بيض و زوج حبات بيض كاملين نخلط بالباتار او الفويي حتى يذوب السكر ثم نضيفه لخليط الكاوكاو و نبق نعجن حتى تندمج لينا كامل المكونات ثم نضيف في الاخير ملعقة كبيرة زبدة تحبوا تخلوه يرتاح او تشكلوا مباشرة ندير حربوش ونبسطه شوية من بعد نحط بلاستيك غذائي و نطبع فوقه باش الحبة تجي بومبي و الحواف يجوا ناعمين من بعد ما نشكله نخليه يرتاح في البلا كي شغل ينشف و كي نطيبه يبق محافظ على شكله نخليه حوالي ساعة و مدة الطهي من 10الى 12دقيقة لا اكثر من الاحسن نستعمل في البلا لي نطيب فيه ورق الطهي احسن من استعمال الفرينة

السيرو:

كيلة سكر. زوج كيلات ماء. شريحة ليمون يغلوا فوق النار عشر دقائق من بعد ما يطيب المخبز و يبرد نغطسهم في السيرو يكون دافي ما نطولش بيهم داخل السيرو غطسة فقط و نخليهم حتى ينشفوا مليح عاد نقلاصيهم 

القلاصاج:

نكيل بالكاس تاع الشاي

بياض بيضة. كاس ماء الزهر. كاس عصير الليمون . ملون ابيض. ثلاث ارباع زيت ننزع منه ملعقتين نخليهم بجهة 

نخلط المقادير مع بعض و نحتافظ بربع الكمية نبق نضيف في السكر حتى نتحصل على عجينة متماسكة نعجنها قليلا باش الطلية تجي ناعمة و شابة من بعد نبق نحل فيها بربع الخليط لي خليناه و نضيف ملعقتين تاع الزيت لي كنا احتافظنا بيهم في الاخير باش يمد لمعة للطلية في هذي المرحلة نضع اللون لي نكونوا حابينه نخليها ترتاح من بعد نقلاصي بيها

ملاحظة:

 الكوكاو كنت حطيت ليكم الطريقة لي نخدمه بيها باش نتخلص في الدهون الزائدة لي فيه و بنته ما تكونش قاوية استعملت طريقة الشاف فيصل يجي بنين و يترحى كامل كيف كيف .

في القلاصاج نستعمل لابوش جد عملية تكملي في وقت قياسي